الرئيسية
أحدث الصور
من طرف فارس الرهان الأربعاء أبريل 30, 2008 5:53 pmانت منوفى ؟ آه . ياساتر يارب . دى دايما بتبقى دراما الحوار مع اى حد منوفى ، لكن بجد عمرك سألت نفسك انت ليه بتكره المنايفة ؟ وياترى هما فعلا
مكروهين كدا ؟ وياترى هما يستهلوا الكراهية دى ؟ وليه ؟ اسئلة كتير جدا ممكن مايكونش لها جواب عندك لكن لوقعدت وفكرت ممكن يكون دا وهم كبير ج
واك نتيجة لتراكمات واجهتك فى حياتك اوناس قالت كدا قدامك ، فيه حد مثلا يقولك بكرهم لانهم بيحبوا السلطة وكفايه ان اتنين منايفة حكموا مصر
ومين عارف يمكن التالت كمان يكون منوفى وفيه حد يقولك دول يهود مصر وفيه ناس يسلموا ويقولوا دول ناس شاطرين وبيفكروا كويس وعندهم
تخطيط ومش بيمشوا خطوة غير مايكون عارفين هما رايحين فين وبرضه بيكرهوهم ، ولو انت منوفى زىَ انا مثلا عليك انك تصبر وتضحك على كل
النكت والامثال اللى بتتقال على المنايفة من اول حطوا الحية والمنوفى فى كيس طلعت الحية تقول يامغيث مرورا بالمنوفى الاصيل زى الجزمة التفصيل
لحد ما توصل لشريطين على كمى ولا قراطين جنب امى دا طبعا غير الحاجات اللى انا مش واخد بالى منها طبعا مطنش عشان مايجنيش اكتئاب ، لكن بجد عمرك قربت اوى من حد منوفى ؟ قبل ماتجاوب على السؤال دا فاكر زهران ورجالته الى طردوا الانجليز من دنشواى لما اعتدوا على واحدة ست وكان
جزاؤهم الشنق اكيد درستها زمان فى التاريخ صح ؟ وياترى عندك فكرة ان المنوفية دى كلمة فرعونية اصلها " من- نفر" ومعناها الارض الطيبة وياترى
عارف ان المنوفية اكبر بلد فيها نسبة متعلمين فى مصر وانك ممكن تلاقى فى البيت الواحد اخ فلاح واخ تانى استاذ فى الجامعة و يوم الاجازة تلقى استاذ
الجامعة بيشتغل مع اخوه فى الغيط وتعرف كمان ان جامعة المنوفية كلياتها من اعلى الكليات فى التنسيق وان المنوفية دايما بتتصدر المحافظات الاكثر
حفظا للقرآن الكريم وينتشر فيها التعليم الازهرى ونظام الكتاتيب حتى الآن بشكل كبير ، لكن اللى انا متاكد منه انك اكيد عارف ان معظم القيادات فى مصر
من اصل منوفى حتى انه ممكن يكون رئيسك فى الشغل منوفى وساعتها طبعا اكيد هتقوله من باب النفاق : حضرتك غيرت فكرتى عن المنايفة والله
ياريس !! وبينك وبين نفسك اكيد مخنوق منه لانه غالبا كان زميلك وبقى ريس عليك ، ولو انت خدمت فى الجيش فاكيد عندك عقدة مكلكعة من المنايفة
لانى على مابسمع ان الشويش عطية كان فى الاصل منوفى ، ودا طبعا اكبر نموذج على العكننة فى الجيش لدرجة انى سمعت ان محافظ المنوفية هيكرم الشويش عطية ويبنى له تمثال فى مدخل مدينة شبين الكوم ، حتى محمود المليجى فى فيلم الارض لما قال كلمته الشهيرة " كنا رجالة ووقفنا واقفة رجالة
" كان منوفى طبعا لان عبد الرحمن الشرقاوى لما كتب الرواية دى كان كاتبها عن بلده وهو طبعا منوفى نسيت اقولك ان الانجليز هما اللى اطلقوا العبار الشهيرة " المنوفى لايلوفى ولو اكلته لحم الكتوفى " بمعنى انهم كانوا فاكرين انهم لو ادوله حاجة هيفوت ويسكت عليهم ويسبهم يبلطجوا فى البلد زى
ماهما عايزين وبعد كدا توارث الناس العبارة دى وفهموها على مزاجهم وترسخت للاسف فى السنوات الاخيرة مع كره الناس للحكومة اللى دايما معظم وزارئها من المنوفية لدرجة ان ايطاليا اشتكت لمصر من نسبة المهاجرين المنوفين الى ارضيها بطريقة غير مشروعة